Minahal nga Magbabasa:

Giabi-abi ikaw namo ngadto sa pinakamasa-aron nga pagtoon sa Biblia pina-agi sa Internet nga gidumalahan sa Seventh-day Adventist Church dinhi sa Southern Asia-Pacific. Kung ikaw nagapangita og tubag sa labing lisod nga pangutana sa imong kinabuhi, kini nga website makatabang kanimo sa pagkaplag sa mga kasulbaran.

Kita nagapuyo karon niining masamokon nga kalibutan diin daghan ang anaa sa kangitngitan naga-antos taliwala sa mga tawhanong gumonhap. Sila nagapaninguha nga makakaplag og tubag sa mga tanghaga sa kinabuhi. Alang sa uban, ang lubnganan maoy kaulihi-ang sulbad sa tawhanong kahimtang ug kini susama sa mga mananap.

Kadtong dili makakaplag sa kasulbaran nagabigti sa kaugalingon, mopatay, masinahon sa uban, mangawat, ug kanunay mahalambigit sa kasamok ngadto sa uban bisan pa sa kaugalingon.

Aduna bay katapusan niining tanan? May paglaum ba? Makabaton ba kita og kalinaw? Aduna bay kaluwasan alang kanato?

Ang kaluwasan ba resulta sa tawhanong pagbati nga siya gawasnon gikan sa mga kasakit o usa ba kini nga kasinatian nga gitanyag nga walay bayad sa labing mahigugmaon, gamhanan ug kahibulongang Manluluwas sa kalibutan, nga si Jesu Kristo?

Imong makaplagan ang mga saktong tubag ug ang labing masanagon nga mga prinsipyo sa kinabuhi pinaagi sa pagtoon sa mga leksyon nga gi-andam niini nga website. Makapili ikaw sa bisan unsa nga hinubad nga pinologan.

Kung ikaw adunay mga pangutana o pakisusi, palihug pagpahibalo kanamo. Malipay gayud kami nga moatiman kanimo.

Sa pagsugod sa imong pagtoon, pag-ampo nga ang Dios magagiya sa imong salabutan ug magahatag kanimo sa kaalam. Hinaut ang Dios magapanalangin kanimo.

Busa magapadayon sa pagsusi!

Imong higala kay Jesus,

Hendrik Sumendap